ბსუ-ს სტუდენტი თინათინ დუმბაძე გაცვლითი პროგრამით არისტოტელეს უნივერსიტეტში



თინათინ დუმბაძე  ბათუმის  შოთა  რუსთაველის  სახელმწიფო  უნივერსიტეტიეკონომიკისა და ბიზნესის ფაკულტეტის მესამე კურსის სტუდენტია, ამჟამად ერაზმუს+ ის  გაცვლითი  პროგრამის  ფარგლებში  ბაკალავრიატის  მეხუთე  სემესტრს  ატარებ არისტოტელეს   თესალონიკის   უნივერსიტეტში(საბერძნეთი)   და   სწავლობ   ეკონომიკისა   და პოლიტიკურ მეცნიერებათა ფაკულტეტის ეკონომიკის სპეციალობაზე. თინათინი  გაცვლითი პროგრამის, საბერძნეთში ცხოვრების და ახალი გამოწვევების გამოცდილებას ბსუ-ს სტუდენტებს უზიარებს.

                 გზა ერაზმუსამდე

სკოლის პერიოდიდან მიზნად მქონდა დასახული,  გაცვლითი პროგრამის მეშვეობით უცხოეთში მიმეღო განათლება და ჩვენ ეს შევძელით: მე და ბსუ-მ!  ბათუმის შოთა რუსთაველის სახელმწიფო უნივერსიტეტში 2017 წელს, როცა გამოცხადდა მიღება ერაზმუს + ის პროგრამაზე,  გადავწყვიტე,  შემევსო  აპლიკაცია  და  „ბედი  მეცადა“.  სიმართლე  გითხრათ,  არ  ვიყავი დარწმუნებული    თუ    შევძლებდი    მიზნის    განხორციელებას,    რადგან    მეორეკურსელი სტუდენტისთვის შეზღუდული კვოტისა და საკმაოდ მაღალი კონკურენციის პირობებში  სტიპენდიის   მოპოვება შეუძლებლად   წარმომედგინა.  ცდამ გაამართლა და ამ მიზნის განხორციელებაში კი ბსუ-ს უზარმაზარი წვლილი მიუძღვის.

ახალი გამოწვევები

ვფიქრობ, უნივერსიტეტში მიღებული   ცოდნისა   და    გამოცდილების    გარეშე,   ძნელი    იქნებოდა    ახალ    სიტუაციასთან ადაპტაცია.  რაც  ყველაზე  მნიშვნელოვანია, ბსუ-ში სამი  სემესტრის  განმავლობაში  გავლილი ინგლისური  ენის ინტენსიური  ურსები  დამეხმარა  გამეუმჯობესებინა  ჩემი  უნარები  და  შესაბამისად, გადამელახა ენობრივი ბარიერი. გარდა   ამისა,   ბსუ-ში სწავლისას  ღირებული და გამოყენებადი ცოდნა დამიგროვა, რომელიც მეხმარება არა მხოლოდ ლექცია - სემინარების მომზადებაში, არამედ ყოველდღიურ ცხოვრებაში.


თესალონიკის არისტოტელეს უნივერსიტეტი

არისტოტელეს უნივერსიტეტის გამოცდილება

არისტოტელეს   უნივერსიტეტი   საბერძნეთსა   და   ზოგადად,   ბალკანეთში  ერთ-ერთი ყველაზე   დიდი    და რეიტინგული უნივერსიტეტიაროგორც ერაზმუსის  პროგრამის მონაწილე სტუდენტს,  უნივერსტიტეტმა  ნებისმიერი ფაკულტეტიდან საგნის არჩევის უფლება მომცა. ამიტომ, ერთ-ერთი საგანი პოლიტიკურ მეცნიერებათა  ფაკულტეტიდან  ავირჩე, რადგად  ვფიქრობ,  კარგი  ეკონომისტი  პოლიტიკაშიც კარგად უნდა ერკვეოდეს. ლექციებს  ყოველ  მომდევნო  კვირას  სხვადასხვა  ლექტორი ატარებდა  ისეთ  თემებთან  დაკავშირებით,  როგორიცაა: პოლიტიკურ-ეკონომიკური     მდგომარეობა     საბერძნეთში,     რელიგიის     როლი,     ლტოლვითა პრობლემა, მაკედონიის საკითხი და სხვა მრავალი. მიუხედავად იმისა, რომ ლექცია სამი საათი გრძელდებოდა და ცდუნება დიდი იყო გაცდენისა,   იმდენად საინტერესო იყო, რომ ვერავითარ შემთხვევაში ვერ მივცემდი თავს უფლებას, გამეცდინა ან დამეგვიანებია.

ერთ-ერთი მნიშვნელოვანი განსხვავება ბსუ-ს და არისტოტელეს უნივერსიტეტს შორის შეფასების სისტემაში შევნიშნე. ბსუ-ში  გამოცდებს ძირითადად წერითი სახე აქვს, არისტოტელეს უნივერსიტეტში კი, საკურსო ნაშრომით ან ზეპირი გამოცდით ფასდები,  რაც  ჩემთვის  უფრო  საინტერესო  აღმოჩნდა.  ზეპირი  გამოცდის  პრაქტიკა  ბსუ-შიც მქონია,  მაგრამ  საკურსო  ნაშრომისა,  სამწუხაროდ,  არა. ასევე, საინტერესო იყო ბიბლიოთეკაში მუშაობის კულტურა,   არისტოტელეს  უნივერისტეტის ბიბლიოთეკა ყოველთვის მაქსიმალურად დატვირთულია და ბიბლიოთეკაში მეცადინეობა სტუდენტების სასწავლო რუტინის განუყოფელი ნაწილია.

საბერძნეთი

საქართველოსა  და  საბერძნეთს ისტორიულად დიდი ხნის  ურთიერთობა  აკავშირებს.  ჩვენ ვიზიარებთ  საერთო  ღირებულებებსა  და  ტრადიციებს,  რელიგიას  და  სხვა  მრავალ  ნიუანსს, შესაბამისად,  ქალაქთან  და ზოგადად  ქვეყანასთან,  კულტურასთან  ადაპტაცია  არ  გამძნელებია. თესალონიკს  ბათუმს  ვამსგავსებ,  ოღონდ  მასშტაბებში  უფრო  დიდია. გამიმართლა,  რომ  შავი    ზღვის    ქალაქიდან    ეგეოსის    ზღვის    ქალაქში   წამოვედი სასწავლებლად.  ხშირად  მეუბნებიან,  რომ  ვიზუალურად  ძალიან  ვგავარ  ბერძენს. საბერძნეთში ჩამოსვლისას კულტურული   არა,   მაგრამ   „ურბანული   შოკი“ განვიცადე.  ჩვენს  პატარა,  დახვეწილ  ბათუმურ  შენობებს  მიჩვეულს თავდაპირველად გამიჭირდა  მონოტონურ,  თეთრ  კორპუსებებთან  შეგუება.  არ  მეგონა,  ქართველ  მძღოლებზე მეტად   რომელიმე  სხვა  ერი თუ  გამაკვირვებდა,  მაგრამ  პირველი  ორი  კვირის  განმვალობაში ალბათ   ნახევარ   საათს   ვუნდებოდი   ერთი   ჩვეულებრივი   ქუჩის   გადაკვეთას. ბერძნები ძალიან   მხიარული   და  ყურადღებიანი ხალხია .   ცდილობენ დაგეხმარონ,   არ   აქვს   მნიშვნელობა,   იციან   თუ   არა   ინგლისური -  ჟესტების,   მიმიკების   ენა ყოვლისშემძლეა.



ერაზმუსამდე და  ერაზმუსის შემდეგ

უცხოეთში განათლებამიღებული სტუდენტებისგან ყოველთვის მესმოდა, რომ საზღვარგარეთ ცხოვრებამ ისინი ძალიან შეცვალა. ეს სიტყვები ყოველთვის გადაჭარბებული მეგონა. თუმცა, საკუთარ  თავზე  გამოვცადე  და  უკვე  ვხედავ  საინტერესო  განსხვავებებს  ხუთი თვის  წინანდელ,  ცხრამეტი  წლის  გამოუცდელ  თინათინსა  და  ამჟამინდელ,  უკვე  გამოცდილ თინათინს   შორის,   რომელსაც   უკეთ   შეუძლია   დამოუკიდებლად   ცხოვრება,   უკეთ   შეუძლია შეზღუდული ფინანსური რესურსების რაციონალურად გამოყენება, არის  უკეთესი  მზარეული, რადგან  აქ  არ  ჰყავს  დედა  ან  მამა,  რომელიც გემრიელ სადილს დაახვედრებს უნივერსიტეტიდან დაბრუნებულს.

 ახლა,  რამდენიმე  თვის  შემდეგ,  დიახ,  მეც  ვამბობ,  რომ  ერაზმუსამდე  და  მის  შემდეგ,  შენ დაინახავ  ორ  განსხვავებულ  „მეს“, ძველს და ახალს, რომელთაგანაც  მეორე  უფრო  მოგეწონება.

გარდა ცოდნისა და გამოცდილებისა, შევიძინე  ახალი  მეგობრები,  ერაზმუსის  ოჯახი,  როგორც  ჩვენ  ვუწოდებთ  ერთმანეთს.  აქ შეძენილი  მეგობრები,  მათთან  ერთად  გატარებული  დრო,  ბედნიერი  წუთები,  ემოციები  მუდამ გამყვება  და   განსაკუთრებული  ადგილი  ექნება  ჩემს  მეხსიერებაში.

მინდა ბსუ-ს თითოეულ  სტუდენტს   ვუთხრა,  რომ გამოიყენეთ შესაძლებლობა, რომელსაც ჩვენი უნივერსიტეტი გაძლევთ და მიიღეთ გაცვლით პროგრამებში მონაწილეობა.  არ შეგეპაროთ    ეჭვი    საკუთარ შესაძლებლობებში! ნუ შეგეშინდებათ კომფორტის ზონიდან გადაბიჯებისა და ახალი გამოწვევების! დამიჯერეთ, ეს ამად ღირს!

მე   კი,   მალე   დავბრუნდები   ჩემს   ლამაზ,   მზიან   ბათუმში,   გაასმაგებული   შემართებით, მოტივაციით და უფრო ნათელი სამომავლო გეგმებით.

ONCE ERASMUS, ALWAYS ERASMUS!
ΓΕΙΑ ΣΑΣ!




Comments